29/07/2021

THAILAND DAILY

NEWSPAPER / MAGAZINE / PUBLISHER

ໂຄງການເພື່ອສັງຄົມ-ສັກວັກຊີນປ້ອງກັນພະຍາດໂຄວິດ-19-ເພື່ອລຸ້ນໂຊກ

ໂຄງການເພື່ອສັງຄົມ ສັກວັກຊີນປ້ອງກັນພະຍາດໂຄວິດ-19 ເພື່ອລຸ້ນໂຊກ

ບໍລິສັດ ຟ້າໃຫຍ່ ມີເດຍ ຫຼື ບິກບລູ ເອເຈນຊີ ລາວໄດ້ຈັດໂຄງການຮ່ວມກັບເພຈຂ່າວອິນໄຊລາວໂດຍ ມີວັດຖຸປະສົງເພື່ອປຸກລະດົມໃຫ້ປະຊາຊົນໃນ ສປປ ລາວ ໄປສັກວັກຊີນປ້ອງກັນພະຍາດໂຄວິດ-19  ເພື່ອຈະໄດ້ເກີດພູມຄຸ້ມກັນໝູ່ (ຕາມຂໍ້ມູນອ້າງອີງຈາກ WHO ຫຼື ອົງການອະນາໄມໂລກ, ປະຊາກອນໃນແຕ່ລະປະເທດຕ້ອງໄດ້ສັກວັກຊີນຢ່າງໜ້ອຍ 70%)  ໂດຍຜູ້ທີ່ຮັບວັກຊີນແລ້ວສາມາດທີ່ຈະມີສິດລຸ້ນລາງວັນໂດຍທາງ ເພຈດັ່ງກ່າວຈະມີການສຸ່ມຈັບຂໍ້ມູນຂອງຜູ້ຮ່ວມຫຼິ້ນກິດຈະກຳເພື່ອລຸ້ນຮັບລາງວັນລະ 500.000 ກີບ/ອາທິດ ເປັນເວລາ 12 ອາທິດ ນັບແຕ່ນີ້ຫາທ້າຍເດືອນກໍລະກົດ 2021 ນີ້.

ທ່ານ ສັນທະລັກ ຈ່າສານ ປະທານບໍລິສັດບິກບລູ ເອເຈນຊີ ກ່າວວ່າ: “ ພວກເຮົາມີຄວາມຕັ້ງໃຈ ທີ່ຈະນຳເງິນຂອງບໍລິສັດບາງສ່ວນ ມາໃຊ້ເພື່ອເປັນການຄືນທຶນສູ່ສັງຄົມ ໂດຍມອບໃຫ້ກັບ ຄົນທີ່ໄດ້ສັກວັກຊີນ ເພື່ອເປັນການເຊີນຊວນໃຫ້ ຄົນມາສັກວັກຊີນໃຫ້ຫຼາຍທີ່ສຸດ. ໂຄງການນີ້ໄດ້ຮ່ວມມືກັບ ເພຈຂ່າວອິນໄຊລາວ ໃນການເຮັດກິດຈະກຳເພື່ອສັງຄົມດັ່ງກ່າວ ພວກເຮົາຫວັງວ່າ ປະຊາຊົນຄົນລາວເຮົາຈະເຫັນຄວາມສຳຄັນ ຂອງການສັກວັກຊີນເພີ່ມຫຼາຍຂຶ້ນ ແລະ ໃນສ່ວນອື່ນທີ່ເຮົາໄດ້ເຮັດໂຄງການນີ້ ຄື: ພວກເຮົາໄດ້ມີການຂຶ້ນປ້າຍ ປຸກລະດົມເຊີນຊວນໃຫ້ປະຊາຊົນໄປສັກຢາວັກຊີນຕ້ານພະຍາດໂຄວິດ-19 ອີກດ້ວຍ, ສຸດທ້າຍນີ້ພວກເຮົາຫວັງວ່າ ໂຄງການດັ່ງກ່າວອາດຈະມີປະໂຫຍດຕໍ່ສັງຄົມບໍ່ຫຼາຍກໍໜ້ອຍ”.

​ກິດຈະກໍາ ຫຼື ກະຕິກາເພື່ອລຸ້ນໂຊກພາຍໃຕ້ໂຄງການ “ສັກລຸ້ນໂຊກ” ນີ້ພຽງແຕ່ປະຊາຊົນທີ່ໄປຮັບການສັກຢາວັກຊີນຖ່າຍຮູບຄູ່ກັບບັດຢັ້ງຢືນການສັກວັກຊີນປ້ອງກັນໂຄວິດ-19 ໂດຍໃຫ້ເຫັນລະຫັດ ID ດ້ານເທິງຂວາຢ່າງຊັດແຈ້ງ (ກະລຸນາປິດຂໍ້ມູນດ້ານເທິງຊ້າຍ ເພື່ອຮັກສາຂໍ້ມູນສ່ວນບຸກຄົນອື່ນໆ ຂອງທ່ານໄວ້ແດ່ເດີ້), ເອົາຮູບນັ້ນມາຄອມເມັ້ນຢູ່ລຸ່ມໂພສ ຂ່າວດັ່ງກ່າວທີ່ໂພສຢູ່ເວບໄຊ InsideLaos ພ້ອມຂຽນລະຫັດໄອດີ ຕາມບັດຕົວຈີງ ຊຶ່ງທາງທີມງານຈະມີການຈັບສະຫຼາກໃນທຸກໆວັນຈັນ ເລິ່ມຕັ້ງແຕ່ວັນຈັນ ທີ 24 ພຶດສະພາ ເຖິງ ວັນຈັນ ທີ 2 ສິງຫາ 2021 ໂດຍຂໍສະຫງວນສິດສຳລັບຜູ້ທີ່ກົດໄລ ຫຼື ກົດຕິດຕາມ ເພຈ InsideLaos ແລ້ວເທົ່ານັ້ນ.

Comments

be the first to comment on this article

Leave a Reply

Your email address will not be published. Required fields are marked *

Take Me Top