25/06/2021

THAILAND DAILY

NEWSPAPER / MAGAZINE / PUBLISHER

ໂຄງການເຂື່ອນໄຟຟ້ານໍ້າເທີນ-i-ສໍາເລັດ-85%

ໂຄງການເຂື່ອນໄຟຟ້ານໍ້າເທີນ I ສໍາເລັດ 85%

ບໍລິສັດ ໄຟຟ້ານໍ້າເທີນ I ຈໍາກັດ ໃຫ້ຮູ້ວ່າ: ໂຄງການເຂື່ອນໄຟຟ້ານໍ້າເທີນ I ຕັ້ງຢູ່ແມ່ນໍ້າກະດິງ ບ້ານໂພນຈະເລີນ ເມືອງປາກກະດິງ ແຂວງ ບໍລິຄໍາໄຊ ຮອດປັດຈຸບັນສໍາເລັດແລ້ວ 85% ພາຍຫຼັງທີ່ເລີ່ມລົງມືກໍ່ສ້າງມາແຕ່ເດືອນ ມີຖຸນາ 2016 ເປັນຕົ້ນມາ ຊຶ່ງມີມູນຄ່າການກໍ່ສ້າງຫຼາຍກວ່າ 1,3 ຕື້ໂດລາສະຫະລັດ ໂດຍມີກໍາລັງຕິດຕັ້ງ 650 MW ສາມາດຜະລິດໄຟຟ້າໄດ້ 2.562 ຈິກາວັດໂມງຕໍ່ປີ, ໃນນັ້ນຈະແບ່ງຂາຍໃຫ້ການໄຟຟ້າຝ່າຍຜະລິດ ແຫ່ງປະເທດໄທ (EGAT) 520 MW ແລະ ຂາຍໃຫ້ລັດວິສະຫະກິດ ໄຟຟ້າລາວ 130 MW ໂດຍ ຈະເລີ່ມມີການຊື້-ຂາຍໃນ ເດືອນພຶດສະພາ 2022 ທີ່ຈະມາເຖິງນີ້.

ເພື່ອເປັນການກັກນໍ້າໃນການກະກຽມຜະລິດໄຟຟ້າໃນອະນາຄົດ, ບໍລິສັດ ໄຟຟ້ານໍ້າເທີນ I ຈໍາກັດ ໄດ້ຈັດພິທີເປີດການກັກເກັບນໍ້າຂອງໂຄງການເຂື່ອນ ໄຟຟ້ານໍ້າເທີນ I ເມື່ອວັນທີ 1 ເມສາ 2021 ທີ່ຜ່ານມາຢູ່ເມືອງປາກກະດິງ ແຂວງບໍລິຄໍາໄຊ ໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງ ແຜນການ ແລະ ການລົງທຶນ, ທ່ານ ຄໍາມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່.

ທ່ານ ປຣີຊາ ກັນທະມູນ ປະທານກໍາມະການບໍລິຫານບໍລິສັດໄຟຟ້າ ນໍ້າເທີນ I ຈໍາກັດ ລາຍງານຄວາມຄືບໜ້າການຈັດຕັ້ງປະຕິບັດເຂື່ອນໄຟຟ້າດັ່ງກ່າວວ່າ: ໂຄງການດັ່ງກ່າວມີໄລຍະສໍາປະທານ 27 ປີ ນັບຈາກມື້ເລີ່ມຜະລິດໄຟຟ້າເປັນທາງ ການ ຊຶ່ງງົບປະມານໃນການກໍ່ສ້າງຫຼາຍກວ່າ 1,3 ຕື້ໂດລາສະຫະລັດ,ໃນນີ້ 70% ແມ່ນເງິນກູ້ຈາກກຸ່ມທະນາຄານໃນປະເທດໄທ ແລະ 30% ແມ່ນສົມທົບທຶນຈາກ ຜູ້ຮ່ວມຮຸ້ນ. ເຂື່ອນດັ່ງກ່າວຈະສ້າງສໍາເລັດ ແລະ ຈະເລີ່ມຂາຍກະແສໄຟຟ້າໃນປີ 2022.

ບໍລິສັດ ໄຟຟ້ານໍ້າເທີນ I ຈໍາກັດ ເປັນບໍລິສັດຮ່ວມຮຸ້ນ ປະກອບມີ: ກຸ່ມບໍລິສັດພອນສັກ ຈໍາກັດ (PSG), ບໍລິສັດ ຜະລິດໄຟຟ້າ ຈໍາກັດ (ມະຫາຊົນ) EGCO ແລະ ບໍລິສັດ ຜະລິດ ໄຟຟ້າລາວ ມະຫາຊົນ (EDL-GEN).

ຂ່າວ-ພາບ: ຕາດໍາ

Comments

be the first to comment on this article

Leave a Reply

Your email address will not be published. Required fields are marked *

Take Me Top