21/10/2021

THAILAND DAILY

NEWSPAPER / MAGAZINE / PUBLISHER

ເປີດນໍາໃຊ້ຫໍສະພາແຫ່ງຊາດ-ຢ່າງເປັນທາງການ

ເປີດນໍາໃຊ້ຫໍສະພາແຫ່ງຊາດ ຢ່າງເປັນທາງການ

ພິທີມອບ-ຮັບ ແລະ ເປີດນໍາໃຊ້ຫໍສະພາແຫ່ງຊາດ ຫຼັງໃໝ່ (ທາດຫຼວງ) ໂດຍໄດ້ຮັບການຊ່ວຍເຫຼືອ ຈາກ ສສ ຫວຽດນາມ ໄດ້ຈັດຂຶ້ນໃນວັນທີ 10 ສິງຫາ 2021, ໂດຍໃຫ້ກຽດເຂົ້າຮ່ວມເປີດນໍາໃຊ້ຫໍສະພາແຫ່ງຊາດດັ່ງກ່າວ ຂອງທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາ ຊົນປະຕິວັດລາວ, ປະທານປະເທດ ແຫ່ງ ສປປ ລາວ ແລະ ທ່ານ ຫງວຽນ ຊວັນ ຟຸກ ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານປະເທດ ແຫ່ງ ສສ ຫວຽດນາມ ພ້ອມດ້ວຍບັນດາຜູ້ແທນພັກ-ລັດ ຂອງສອງຊາດ ລາວ-ຫວຽດນາມເຂົ້າຮ່ວມ.

ຫໍສະພາແຫ່ງຊາດລາວຫຼັງໃໝ່ນີ້ ເປັນອາຄານ 5 ຊັ້ນ, ສູງ 34,6 ແມັດ, ມີເນື້ອທີ່ອາຄານປຸກສ້າງທີ່ຕິດກັບໜ້າດິນ 7.171 ຕາແມັດ, ເປັນອາຄານທີ່ມີຄວາມສວຍງາມ, ໂອໂຖງ, ສະຫງ່າ ມີລວດລາຍ ທີ່ເປັນເອກະລັກ ທາງດ້ານສິລະປະວັດທະນະທຳຂອງລາວ ປະສົມປະສານກັບຄວາມທັນສະໄໝ ຂອງຍຸກສະໄໝ, ຊຶ່ງເປັນເອກະລັກສະເພາະຂອງສະພາແຫ່ງຊາດ.

ໃນຫໍສະພາດັ່ງກ່າວ ປະກອບມີຫ້ອງປະຊຸມ, ຫ້ອງເຮັດວຽກ, ຫ້ອງບໍລິຫານ ແລະ ອື່ນໆ ຊຶ່ງມີລະບົບຄວາມປອດໄພ ທີ່ໄດ້ມາດຕະຖານ, ໃນນັ້ນ ທັງໝົດອາຄານ ສາມາດບັນຈຸໄດ້ 800-1.000 ຄົນ ແລະ ຫ້ອງປະຊຸມສະພາແຫ່ງຊາດ ສາມາດບັນຈຸໄດ້ 400​ ກວ່າຄົນ.

ສ່ວນທຶນໃນການກໍ່ສ້າງ ແມ່ນໄດ້ຮັບການຊ່ວຍເຫຼືອ ຈາກ ສສ ຫວຽດນາມ ມູນຄ່າ 100 ລ້ານໂດລາ ບົນຈິດໃຈແຫ່ງຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເພື່ອມອບເປັນຂອງຂວັນໃຫ້ແກ່ ພັກ, ລັດ ແລະ ປະຊາຊົນລາວ, ຊຶ່ງຫໍປະຊຸມສະພາແຫ່ງຊາດຫຼັງນີ້ ຈະກາຍເປັນໜຶ່ງໃນສັນຍາລັກ ແຫ່ງຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ທັງຈະເປັນມູນມໍລະດົກອັນລໍ້າຄ່າ ໃຫ້ແກ່ລູກຫຼານຂອງພວກເຮົາ ໄດ້ປົກປັກຮັກສາ ແລະ ສືບຕໍ່ນຳໃຊ້ ໃນອະນາຄົດ.

Comments

be the first to comment on this article

Leave a Reply

Your email address will not be published. Required fields are marked *

Take Me Top