22/10/2021

THAILAND DAILY

NEWSPAPER / MAGAZINE / PUBLISHER

ເຈົ້ານະຄອນປາກເຊ-ອອກມາດຕະການປ້ອງກັນພະຍາດໂຄວິດ-19-ໃນໄລຍະປິດການເຂົ້າ-ອອກ-ນະຄອນປາກເຊ-7-ວັນ

ເຈົ້ານະຄອນປາກເຊ ອອກມາດຕະການປ້ອງກັນພະຍາດໂຄວິດ-19 ໃນໄລຍະປິດການເຂົ້າ-ອອກ ນະຄອນປາກເຊ 7 ວັນ

ນະຄອນປາກເຊ ແຂວງຈໍາປາສັກຈະເລີ່ມມີການປິດການເຂົ້າ-ອອກ ພາຍໃນນະຄອນປາກເຊນັບແຕ່ເວລາ 21 ໂມງ 00 ນາທີຂອງວັນທີ 14 ສິງຫາ ເຖິງ ເວລາ 06 ໂມງ 00 ນາທີ ຂອງວັນທີ 20 ສິງຫາ 2021 ຫຼື 7 ວັນ ເພື່ອເພີ່ມທະວີໃນການປ້ອງກັນການແຜ່ລະບາດຂອງພະຍາດໂຄວິດ-19 ພາຍຫຼັງທີ່ກວດພົບຜູ້ຕິດເຊື້ອໃນຊຸມຊົນທີ່ມີຈໍານວນເພີ່ມຂຶ້ນ ຈາກ 2 ຄົນໃນມື້ວັນທີ 12 ສິງຫາ ເພີ່ມຂຶ້ນເປັນ 5 ຄົນໃນວັນທີ 13 ສິງຫາ 2021 ທີ່ຜ່ານມາ.

ທ່ານບົວລີ ເພັດສົງຄາມ ເຈົ້ານະຄອນປາກເຊໄດ້ອອກມາດຕະການປ້ອງກັນພະຍາດໂຄວິດ-19 ເມື່ອວັນທີ 13 ສິງຫາ 2021 ໃຫ້ທຸກຊັ້ນຄົນປະຕິບັດໃນໄລຍະປິດການເຂົ້າ-ອອກນະຄອນປາກເຊ ດັ່ງນີ້: ໃຫ້ທຸກພາກສ່ວນເອົາໃຈໃສ່ສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດຢ່າງເຂັ້ມງວດ ຄໍາສັ່ງ ສະບັບເລກທີ 15/ນຍ ລົງວັນທີ 21 ເມສາ 2021 ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບ ດ້ານ ຕ້ານພະຍາດໂຄວິດ-19 ແລະ ຄໍາສັ່ງຂອງທ່ານເຈົ້າແຂວງໆ ຈໍາປາສັກ ສະບັບເລກທີ 11/ຈຂ.ຈສ, ລົງວັນທີ 6 ສິງຫາ 2021, ຫ້າມບໍ່ໃຫ້ມີການສັນຈອນໄປມາໃນເວລາ 7 ວັນທີ່ມີການປິດການເຂົ້າ-ອອກ ນັບແຕ່ເວລາ 21:00 ໂມງ ເຖິງເວລາ 05:00 ໂມງເຊົ້າ ຂອງວັນຖັດໄປ, ຍົກເວັ້ນໄດ້ຮັບອະນຸຍາດຈາກຄະນະສະເພາະກິດຂັ້ນແຂວງ ຫຼື ນະຄອນ, ຫ້າມຄົນຢູ່ໃນນະຄອນປາກເຊ ເດີນທາງໄປຕ່າງເມືອງ, ຕ່າງແຂວງ, ຫ້າມຄົນຕ່າງແຂວງ, ຕ່າງ ເມືອງ ເດີນທາງເຂົ້າມານະຄອນປາກເຊ, ຍົກເວັ້ນຜູ້ທີ່ມີພູມລໍາເນົາ, ເຮັດວຽກປະຈໍາຢູ່ ນະຄອນປາກເຊ ແລະ ຜູ້ທີ່ໄດ້ຮັບອະນຸຍາດຈາກຄະນະສະເພາະກິດຂັ້ນແຂວງ, ຂັ້ນທ້ອງຖິ່ນ, ໃຫ້ໂຈະການບໍລິການຂົນສົ່ງໂດຍສານ ຈາກຕ່າງແຂວງ ແລະ ເມືອງ ເຂົ້າມາ ນະຄອນປາກເຊ ສ່ວນການຂົນສົ່ງສິນຄ້າແມ່ນໃຫ້ສາມາດຈັດຕັ້ງຕາມປົກກະຕິ ໂດຍໃຫ້ປະຕິບັດຕາມມາດຕະການປ້ອງກັນ ແລະຄວບຄຸມ ທີ່ຄະນະສະເພາະກິດຂັ້ນສູນກາງ ແລະ ຂັ້ນແຂວງວາງອອກ, ສໍາລັບຜູ້ທີ່ມີຄວາມຈໍາເປັນ ເຊັ່ນ: ການເຈັບເປັນ, ການເສຍຊີວິດ ແລະ ການປະຊຸມທາງ ລັດຖະການ ທີ່ຈະເດີນທາງໄປປະຕິບັດຫນ້າທີ່ຢູ່ຕ່າງແຂວງ, ຕ່າງເມືອງ ແມ່ນໃຫ້ຂໍໜັງສືອະນຸຍາດເດີນ ທາງນໍາຄະນະສະເພາະກິດຂັ້ນແຂວງ, ຂັ້ນເມືອງ-ນະຄອນ ຈຶ່ງສາມາດເດີນທາງໄດ້, ຫ້າມຈັດກອງປະຊຸມ, ໂຮມຊຸມນຸມ, ງານສ້າງສັນຊຸມແຊວ, ງານລ້ຽງຕ່າງໆ, ບຸນປະເພນີ, ພິທີ ກໍາທາງສາສະໜາທຸກກໍລະນີ, ຍົກເວັ້ນງານສົບ-ງານສົ່ງສະການ-ແຈກເຂົ້າ ແຕ່ຕ້ອງປະຕິບັດຕາມມາດຕະການປ້ອງກັນການລະບາດຢ່າງເຂັ້ມງວດ, ຫ້າມປະຊາຊົນ, ພະນັກງານ-ລັດຖະກອນ,ທະຫານ,ຕໍາຫຼວດ,ກໍາມະກອນ,ນັກຮຽນ,ນັກສຶກສາ, ຜູ້ປະກອບການ, ນັກບວດ, ພໍ່ແມ່ປະຊາຊົນ, ຊາວຕ່າງດ້າວ, ຜູ້ບໍ່ມີສັນຊາດ ແລະ ຊາວຕ່າງປະເທດ ທີ່ ອາໄສ ແລະ ດໍາລົງຊີວິດຢູ່ນະຄອນ ປາກເຊ ອອກຈາກເຮືອນ ຫຼື ທີ່ພັກອາໄສຂອງຕົນ, ຍົກເວັ້ນກໍລະນີຈໍາ ເປັນເຊັ່ນ: ຜູ້ທີ່ຈະອອກໄປສັກຢາວັກແຊັງຕ້ານພະຍາດ ໂຄວິດ- 19, ໄປຊື້ເຄື່ອງອຸປະໂພກ-ບໍລິໂພກ, ໄປໂຮງໝໍ, ໄປປະຕິບັດໜ້າທີ່ໃນກິດຈະການທີ່ລະບຸໄວ້, ສ່ວນຜູ້ທີ່ຈໍາເປັນຕ້ອງໄປເຮັດການຜະລິດກະສິກໍາເພື່ອເປັນສະບຽງອາຫານ, ຜູ້ໄປຄ້າຂາຍເຄື່ອງອຸປະໂພກ, ບໍລິໂພກກໍ່ສາມາດປະຕິບັດໄດ້ ແຕ່ມອບໃຫ້ ອໍານາດການປົກຄອງບ້ານເປັນຜູ້ກວດກາ, ຄຸ້ມຄອງດ້ານຈໍານວນແລະຂອບເຂດຢ່າງຮັດກຸມເພື່ອບໍ່ໃຫ້ມີ ຄວາມສ່ຽງຕໍ່ການລະບາດຂອງພະຍາດ ໂຄວິດ- 19, ໃຫ້ບັນດາພະແນກການ, ກົມກອງ, ຫ້ອງການ, ວິສາຫະກິດລັດ, ເອກະຊົນ ແລະ ບັນດາ ບໍລິສັດ ໃນທົ່ວນະຄອນປາກເຊ ຫຼຸດຜ່ອນຈໍານວນ ການມາປະຈໍາການຂອງພະນັກງານ – ລັດຖະກອນ, ກໍາມະກອນ ໂດຍຜັດປ່ຽນກັນມາເຮັດວຽກໃນແຕ່ລະວັນ ຕາມຄວາມເຫມາະສົມ (ສໍາລັບພະນັກງານລັດຖະກອນຜູ້ທີ່ມີລູກນ້ອຍ ຕ້ອງເບິ່ງແຍງຢ່າງໃກ້ຊິດ, ອະນຸຍາດໃຫ້ພໍ່ ຫຼື ແມ່ ຜັດປ່ຽນກັນດູແລລູກ) ຍົກເວັ້ນ ທະຫານ, ຕໍາຫຼວດ, ເຈົ້າໜ້າທີ່ດັບເພີງ, ພະນັກງານຮັບຜິດຊອບລະບົບການບໍລິການໄຟຟ້າ, ນ້ໍາປະປາ, ບໍລິສັດເກັບມ້ຽນຂີ້ເຫຍື້ອ, ໂທລະຄົມມະນາຄົມ, ການສື່ສານ, ຂົນສົ່ງສິນຄ້າທີ່ຈໍາເປັນ, ພະນັກງານ ສາທາລະນະສຸກ, ແພດ-ໝໍ, ອາສາສະໝັກສາທາລະນະສຸກ, ຜູ້ທີ່ໄດ້ຮັບມອບໝາຍໃຫ້ປະຈໍາການ ແລະ ເຮັດວຽກສະກັດກັ້ນ, ຄວບຄຸມ ແລະ ປິ່ນປົວພະຍາດ (ປະຕິບັດຕາມ ຂໍ້ 5) ສ່ວນຜູ້ທີ່ບໍ່ໄດ້ມາປະຈໍາການ ແມ່ນໃຫ້ສືບຕໍ່ເຮັດວຽກຂອງຕົນ ເປັນປົກກະຕິຢູ່ເຮືອນ ຫຼື ທີ່ພັກອາໄສໂດຍຜ່ານ ລະບົບສື່ສານອີເລັກ ໂຕຣນິກ ແລະ ເຄືອຂ່າຍອິນເຕີເນັດ ເຊັ່ນ: ໂທລະສັບ, ອີເມວ ແລະ ລະບົບກອງປະຊຸມທາງໄກ ແລະ ອື່ນໆ, ໃຫ້ສືບຕໍ່ໂຈະການຮຽນ-ການສອນຊົ່ວຄາວ ຂອງມະຫາວິທະຍາໄລຈໍາປາສັກ, ວິທະຍາໄລພາກລັດ ແລະ ເອກະຊົນ, ອາຊີວະສຶກສາ, ໂຮງຮຽນສຶກສາສົງ, ໂຮງຮຽນມັດທະຍົມຕົ້ນ, ມັດທະຍົມປາຍ, ປະຖົມ, ອະນຸບານ, ລ້ຽງເດັກ ໃນຂອບເຂດທົ່ວນະຄອນ ປາກເຊ ໄປຮອດວັນທີ 23 ສິງຫາ 2021, ໃຫ້ປິດກິດຈະການຊົ່ວຄາວໃນຂອບເຂດນະຄອນປາກເຊ ເຊັ່ນ: ການບໍລິການຫ້ອງກວດ ພະຍາດເອກະຊົນທຸກປະເພດ, ຮ້ານກິນດື່ມ, ຮ້ານຄາລາໂອເກະ, ຮ້ານຮົມຢາ, ຮ້ານບໍລິການນວດ, ຮ້ານສະປາ, ຮ້ານບັນເທີງ, ຣີສອດ, ສວນນໍ້າ, ສວນອາຫານ, ສະຖານທີ່ທ່ອງທ່ຽວຕ່າງໆ, ຮ້ານເກມອອນລາຍ, ຕະຫຼາດກາງຄືນ, ຮ້ານເສີມສວຍ, ຮ້ານຕັດຜົມ ລວມທັງສະຖານທີ່ອອກກໍາລັງກາຍທຸກປະເພດໃນຮົ່ມ, ກາງແຈ້ງ ແລະ ຕາມສວນສາທາລະນະ ( ເດີ່ນເຕະບານ, ສະໜາມກອັບ, ເດີ່ນຕີບຸນ, ເດີ່ນຕີດອກປີກໄກ່, ສັງວຽນຕິໄກ່, ສະໜຸກເກີ້ ແລະ ອື່ນໆ ສໍາລັບຮ້ານອາຫານ ແລະ ຮ້ານກາເຟ ແມ່ນອະນຸຍາດໃຫ້ຂາຍ ແລະ ຊື້ກັບບ້ານເທົ່ານັ້ນ, ແຕ່ບໍ່ອະນຸຍາດໃຫ້ນັ່ງກິນໃນຮ້ານ, ອະນຸຍາດໃຫ້ເປີດຕະຫຼາດໄດ້ ນັບແຕ່ເວລາ 05 ໂມງ 00 ນາທີ ເຖິງ ເວລາ 18 ໂມງ 00 ນາທີ, ແຕ່ໃຫ້ປະຕິບັດມາດຕະການປ້ອງກັນຢ່າງເຄັ່ງຄັດ ເຊັ່ນ: ການໃສ່ຜ້າອັດປາກ-ດັງ, ຮັກສາໄລຍະຫ່າງ 1 ແມັດຂຶ້ນໄປ, ຈັດໃຫ້ມີເຈວລ້າງມື ແລະ ປະຕິບັດການຜົ່ນຢາຂ້າເຊື້ອທຸກວັນ ຫຼັງຈາກປິດຕະຫຼາດ, ອະນຸຍາດໃຫ້ເປີດ ສູນການຄ້າ, ຮ້ານຂາຍເຄື່ອງອຸປະໂພກ-ບໍລິໂພກ, ຮ້ານມິນິມາກ ແລະ ຮ້ານ ຂາຍເຄື່ອງຍ່ອຍຕ່າງໆ ແຕ່ເວລາ 07 ໂມງ 00 ນາທີ ເຖິງ ເວລາ 20 ໂມງ 00 ນາທີ ແຕ່ຕ້ອງປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ,  ຫ້າມບັນດາບຸກຄົນ ແລະ ນິຕິບຸກຄົນ ກັກຕຸນ ແລະ ຂຶ້ນລາຄາສິນຄ້າທຸກປະເພດ ເປັນຕົ້ນ ຜ້າປິດປາກ-ດັງ,ນໍ້າຢາລ້າງມື, ຢາປົວພະຍາດ, ອຸປະກອນການແພດ, ເຂົ້າ, ອາຫານ, ນໍ້າດື່ມ ແລະ ເຄື່ອງ ອຸປະໂພກ-ບໍລິໂພກອື່ນໆ, ຫ້າມໂຄສະນາເຜີຍແຜ່ ແລະ ສົ່ງຂໍ້ມູນຂ່າວສານທີ່ບໍ່ມີມູນຄວາມຈິງ ໃນຮູບແບບໃດໜຶ່ງ ຜ່ານສື່ຕ່າງໆ ເຊິ່ງຈະເຮັດໃຫ້ສັງຄົມມີຄວາມເຂົ້າໃຈຜິດ, ສ້າງຄວາມແຕກຕື່ນ ແລະ ສົ່ງຜົນກະທົບໃນທາງ ລົບຕໍ່ສັງຄົມ, ໃຫ້ຕິດຕາມແຫຼ່ງຂໍ້ມູນຂ່າວ ສານຂອງທາງການເທົ່ານັ້ນ, ໃຫ້ຄະນະສະເພາະກິດຕ້ານພະບາດໂຄວິດ -19 ນະຄອນປາກເຊ ສົມທົບກັບເຈົ້າໜ້າທີ່ ກ່ຽວຂ້ອງ ຕັ້ງຈຸດກວດກາ ຄົນເຂົ້າ-ອອກນະຄອນ ແລະ ບ້ານຕໍ່ບ້ານ, ພ້ອມທັງຊີ້ນໍາໃຫ້ຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ຂະແໜງການຜູ້ສື່ຂ່າວທຸກພາກສ່ວນ ສືບຕໍ່ເພີ່ມທະວີການໂຄສະນາ ເຜີຍແຜ່ຢ່າງກວ້າງຂວາງ ແລະ ເລິກເຊິ່ງດ້ວຍຫຼາຍຮູບແບບ ແລະ ຫຼາຍວິທີຜ່ານທາງສື່ຕ່າງໆ ເປັນຕົ້ນ: ໂທລະພາບ, ວິທະຍຸ, ໂທລະໂຄ່ງ ແລະ ອື່ນໆ ໃຫ້ທຸກຄົນຮັບຮູ້, ເຂົ້າໃຈລະບຽບການ, ເຫັນໄດ້ໄພ ອັນຕະລາຍຂອງພະຍາດ ດັ່ງກ່າວ, ຮູ້ຈັກວິທີສະກັດກັ້ນ, ຄວບຄຸມ ແລະ ປ້ອງກັນດ້ວຍຕົນເອງ, ໃຫ້ກອງບັນຊາການປ້ອງກັນຄວາມສະຫງົບ, ກອງບັນຊາການທະຫານ, ຫ້ອງການ ສາທາລະນະສຸກນະຄອນປາກເຊ ຕັ້ງຈຸດກວດກາຄົນເຂົ້າ-ອອກ ນະຄອນຢູ່ 4 ຈຸດ ຄື: ຈຸດກວດກາຫຼັກ 8 ເໝືອ (ບ້ານດົງເກາະໂລງ), ຈຸດກວດກາໜ້າສວນວັດທະນະທໍາຫຼັກ 7, ຈຸດກວດກາເສັ້ນທາງສາລາ ຂຽວດົງຈອງ (ຫຼັກ8 ) ແລະ ຈຸດກວດກາບ້ານຄັນແຍງ, ຜູ້ຕິດເຊື້ອ ແລະ ຜູ້ສໍາຜັດໃກ້ຊິດ ກັບຜູ້ຕິດເຊື້ອພະຍາດໂຄວິດ- 19 ໃຫ້ຮີບຮ້ອນ ໄປເກັບຕົວຢ່າງຢູ່ສະໜາມກິລາຫຼັກ 2 ແລະ ຫ້ອງການສາທາລະນະສຸກນະຄອນປາກເຊ ເພື່ອກວດກາ ແລະ ຮັກສາສຸຂະພາບແຕ່ຫົວທີ ໂດຍບໍ່ມີຄ່າໃຊ້ຈ່າຍ, ພ້ອມທັງໃຫ້ຈໍາກັດບໍລິເວນ 14 ວັນ, ໃຫ້ລາຍງານຂໍ້ມູນ ສະພາບເຄື່ອນໄຫວຕ່າງໆຂອງຕົນ ໃຫ້ຄະນະສະເພາະກິດ ຢ່າງຮີບດ່ວນ ແລະ ປະຕິບັດຢ່າງ ເຂັ້ມງວດ 10 ຂັ້ນຕອນການເຝົ້າລະວັງ ແລະ ຄວບຄຸມການລະບາດໃນຊຸມຊົນ ຂອງຄະນະສະເພາະກິດ

ຂັ້ນແຂວງວາງອອກ ສໍາລັບຜູ້ບໍ່ທັນໄດ້ຮັບການສັກຢາວັກຊິນ ປ້ອງກັນພະຍາດ ໂຄວິດ-19 ແມ່ນໃຫ້ ຮີບຮ້ອນ ໄປຮັບການສັກຢາດັ່ງກ່າວ ຕາມວັນເວລາ ແລະ ສະຖານທີ່ ທີ່ນະຄອນໄດ້ຈັດຕັ້ງບໍລິການ ຕາມແຈ້ງການ ທີ່ແຈ້ງໄປແລ້ວ, ບຸກຄົນ ຫຼື ນິຕິບຸກຄົນ ຫາກລະເມີດຄໍາສັ່ງ ສະບັບນີ້ ຈະຖືກດໍາເນີນມາດຕະການ ຕາມທີ່ໄດ້ ລະບຸໄວ້ໃນ ຄໍາສັ່ງ ເລກທີ 02/ຈນຄ.ປຊ, ລົງວັນທີ 6 ພຶດສະພາ 2021.

Comments

be the first to comment on this article

Leave a Reply

Your email address will not be published. Required fields are marked *

Take Me Top