17/06/2021

THAILAND DAILY

NEWSPAPER / MAGAZINE / PUBLISHER

ວັນຊາປະນະກິດສົບພັນລະຍາອະດີດປະທານປະເທດ,-ລູກ-ແລະ-ຫຼານທີ່ເສຍຊີວິດຈາກອຸປະຕິເຫດ-ຈະໄດ້ຈັດຂຶ້ນໃນວັນພະຫັດ-ທີ່ຈະມາເຖິງນີ້ທີ່ວັດທາດຝຸ່ນ

ວັນຊາປະນະກິດສົບພັນລະຍາອະດີດປະທານປະເທດ, ລູກ ແລະ ຫຼານທີ່ເສຍຊີວິດຈາກອຸປະຕິເຫດ ຈະໄດ້ຈັດຂຶ້ນໃນວັນພະຫັດ ທີ່ຈະມາເຖິງນີ້ທີ່ວັດທາດຝຸ່ນ

ຄະນະບໍລິຫານງານສູນກາງພັກ, ລັດຖະບານ, ຫ້ອງວ່າການສໍານັກງານນາຍົກລັດຖະມົນຕີ, ຫ້ອງວ່າການສູນກາງພັກ, ອົງການປົກຄອງແຂວງວຽງຈັນ, ຄະນະຊາປະນະກິດສົບ ພ້ອມດ້ວຍ ຄອບຄົວ ໄຊຍະສອນ ຂໍແຈ້ງຂ່າວຄວາມເສົ້າສະຫຼົດໃຈ ມາຍັງການຈັດຕັ້ງພັກ-ລັດ, ເພື່ອນມິດ ສະຫາຍ ທີ່ຢູ່ໃກ້ ແລະ ໄກຊາບທົ່ວເຖິງກັນວ່າ: ສະຫາຍ ວິດົງ ໄຊຍະສອນ ອະດີດກໍາມະການສູນ ກາງພັກ ສະໄໝທີ X, ອະດີດເລຂາພັກແຂວງເຈົ້າແຂວງໆວຽງຈັນ, ລັດຖະມົນຕີປະຈໍາສໍານັກງານນາຍົກລັດຖະມົນຕີ, ທ່ານ ນາງ ແກ້ວສາຍໃຈ ໄຊຍະສອນ ພັນລະຍາຂອງທ່ານ ຈູມມະລີ ໄຊຍະສອນ ອະດີດເລຂາທິການໃຫຍ່ ຄະນະບໍລິຫານງານສູນກາງພັກ, ອະດີດປະທານປະເທດແຫ່ງ ສປປ ລາວ ແລະ ລູກ, ແລະຫຼານຈໍານວນໜຶ່ງທີ່ໄດ້ເສຍຊີວິດດ້ວຍອຸບັດເຫດທາງນໍ້າ (ເຮືອຫຼົ້ມ) ໃນຕອນເຊົ້າຂອງ ວັນທີ 4 ເມສາ 2021 ທີ່ຜ່ານມາ.

ເພື່ອຈາລຶກຄຸນງາມຄວາມດີ ຂອງບັນດາສະຫາຍທີ່ໄດ້ອຸທິດແກ່ປະເທດຊາດ, ດ້ວຍຄວາມອາ ໄລອາວອນຢ່າງສຸດຊຶ້ງຕໍ່ການຈາກໄປຂອງບັນດາທ່ານບັນດາສະຫາຍ ຊຶ່ງເປັນໜຶ່ງໃນບັນດາການນໍາຂັ້ນສູງ ຂອງພັກ -ລັດ, ຄະນະບໍລິຫານງານສູນກາງພັກ, ລັດຖະບານ, ຫ້ອງວ່າການສໍານັກງານນາຍົກລັດຖະມົນຕີ, ຫ້ອງວ່າການສູນກາງພັກ, ຄະນະຊາປະນະກິດສົບ, ພ້ອມດ້ວຍຄອບຄົວ ໄຊຍະສອນ ໄດ້ຕົກລົງໄວ້ອາໄລຢ່າງເປັນທາງການ ເປັນເວລາ 4 ວັນ ນັບແຕ່ວັນທີ 5-8 ເມສາ 2021. ປັດຈຸບັນສົບຂອງພວກເພິ່ນໄດ້ບໍາເພັນກຸສົນໄວ້ຢູ່ທີ່ສະໂມສອນກະຊວງປ້ອງກັນປະເທດ (ໂພນເຄັງ) ພິທີວາງພວງມາລາເປັນທາງການ ແມ່ນເລີ່ມແຕ່ວັນທີ 6-7 ເມສາ 2021 ຕາມເວລາທາງລັດຖະການ.

ວັນຊາປະນະກິດສົບຈະໄດ້ຈັດຂຶ້ນຢ່າງເປັນທາງການ ໃນວັນທີ 8 ເມສາ 2021 ເວລາ 13:00ໂມງ ທີ່ວັດເທບນິມິດ ( ທາດຝຸ່ນ ).

ດັ່ງນັ້ນ, ຈຶ່ງແຈ້ງຂ່າວຄວາມເສົ້າສະຫຼົດໃຈ ມາຍັງສະມາຊິກພັກ, ພະນັກງານ, ລັດຖະກອນ, ປະຊາຊົນບັນດາເຜົ່າ, ເພື່ອນມິດສະຫາຍ ແລະ ຍາດຕິພີ່ນ້ອງທີ່ຢູ່ໃກ້ ແລະ ໄກຊາບທົ່ວເຖິງກັນ.

Comments

be the first to comment on this article

Leave a Reply

Your email address will not be published. Required fields are marked *

Take Me Top