ເກີດເຫດແຜ່ນດິນໄຫວ 2 ຄັ້ງ ມີຄວາມແຮງສັ່ນສະເທືອນວັດແທກໄດ້ 3.5 ຣິກເຕີ ແລະ 5.8 ຣິກເຕີ ຢູ່ເຂດບ້ານສະລາ ແລະ ບ້ານຫ້ວຍສະຫຼອດ ເມືອງໄຊສະຖານ ແຂວງໄຊຍະບູລີ ເມື່ອວັນທີ 20 ທັນວາ 2021 ຜ່ານມານີ້, ຊຶ່ງເປັນແຜ່ນດິນໄຫວ ຂ້ອນຂ້າງຮູນແຮງ ແລະ ເກີດຂຶ້ນຢູ່ໃຈກາງເມືອງ, ແຕ່ຊາວເມືອງໄຊສະຖານ ແມ່ນບໍ່ໄດ້ຮັບຜົນກະທົບຈາກແຜ່ນດີນໄຫວ 2 ຄັ້ງດັ່ງກ່າວ ຍ້ອນມັນ​ໄດ້​ສິ້ນ​ສຸດ​ລົງ​ໃນ​ບໍ່​ເທົ່າ​ໃດ​ວິ​ນາ​ທີ.

ທ່ານ ພັນໂທ ສົມແສງ ຈັນທິດ ຫົວໜ້າຫ້ອງການປ້ອງກັນຄວາມສະຫງົບເມືອງໄຊສະຖານ ໄດ້ໃຫ້ສໍາພາດກັບນັກຂ່່າວວຽງຈັນທາຍ ວ່າ: ແຜ່ນດີນໄຫວ 2 ຄັ້ງນີ້ ​ບໍ່​ແມ່ນ​ແຜ່ນ​ດິນ​ໄຫວ​ຄັ້ງ​ທຳ​ອິດ​ທີ່​ເກີດຂຶ້ນ​ຢູ່​ເມືອງ​ໄຊ​ສະຖານ, ມີຫຼາຍໆຄັ້ງໃນປີນີ້ ທີ່​ເກີດແຜ່ນ​ດິນ​ໄຫວຢູ່ເມືອງດັ່ງກ່າວ ແຕ່ບໍ່ມີອັນໃດເສຍຫາຍຮ້າຍແຮງ, ແຕ່ສໍາລັບປີກາຍ 2020 ຜ່ານມານີ້ ໄດ້ເກີດແຜ່ນດິນໄຫວໃນລະດັບຄວາມແຮງສັ່ນສະເທືອນວັດແທກໄດ້ 7-8 ຣິກເຕີ ທີ່ເມືອງໄຊສະຖານ, ຊຶ່ງເປັນແຜ່ນດິນໄຫວທີ່ຮຸນແຮງ ແລະ ເຮັດໃຫ້ເຮືອນປະມານ 20 ຫຼັງໄດ້ຮັບຄວາມເສຍຫາຍ.

ສະເພາະ ປິ 2019, ​ກໍໄດ້​ເກີດ​ແຜ່ນ​ດິນ​ໄຫວ ລະດັບຄວາມແຮງສັ່ນສະເທືອນວັດແທກໄດ້ 6.4 ຣິກເຕີ ​ແລະ 5.9 ຣິກເຕີ ​ຢູ່ເມືອງ​ຫົງ​ສາ ​ແຂວງ​ໄຊ​ຍະ​ບູລີ,​ ແຜ່ນດີນໄຫວດັ່ງກ່າວ ເຮັດໃຫ້ເຮືອນປະຊາຊົນໄດ້​ຮັບ​ຄວາມ​ເສຍ​ຫາຍ13 ຫຼັງ ແຕ່ໂຊກດີທີ່ມີພຽງແຕ່ 2 ຄົນໄດ້ຮັບບາດເຈັບເລັກນ້ອຍ.