18/10/2021

THAILAND DAILY

NEWSPAPER / MAGAZINE / PUBLISHER

ການພັດທະນາສື່ແບບໃໝ່ມີຄວາມ-ໝາຍສຳຄັນຕໍ່ຖັນແຖວສື່ມວນຊົນລາວ

ການພັດທະນາສື່ແບບໃໝ່ມີຄວາມ ໝາຍສຳຄັນຕໍ່ຖັນແຖວສື່ມວນຊົນລາວ

ສະ​ມາ​ຄົມ​ນັກ​ຂ່າວ​ແຫ່ງ ສ​ປ​ປ ລາວ ຮ່ວມ​ກັບວິ​ທະ​ຍຸ​ສາ​ກົນ ແຫ່ງ​ປະ​ເທດ​ຈີນ (CRI) ປະ​ຈຳ​ລາວ ໄດ້ຈັດຕັ້ງ “ເວທີປຶກ​ສາ​ຫາ​ລືການພັດທະນາສື່ແບບໃໝ່ ” ເຊົ້າມື້ນີ້ ວັນທີ 26 ສິງ​ຫາ 2021 ທີ່ໂຮງ​ແຮມ ແລນ​ມາກ ນະ​ຄອນ​ຫຼວງວຽງ​ຈັນ, ພາຍໃຕ້ການເປັນປະທານຂອງທ່ານ ສະຫວັນຄອນ ຣາຊະມົນຕຣີ ປະທານ ສະ​ມາ​ຄົມ​ນັກ​ຂ່າວ​ແຫ່ງ ສ​ປ​ປ ລາວ, ພ້ອມນີ້ ຍັງມີທ່ານ ນາງ MO Xiaoling ຫົວໜ້າ CRI ປະ​ຈຳ​ລາວ, ບັນດາຄະນະກົມ, ຄະນະນໍາສື່ມວນຊົນ ພ້ອມດ້ວຍບັນດາ ນັກຂ່າວ ແລະ ພາກສ່ວນກ່ຽວຂ້ອງ ຈາກພາກລັດ-ພາກເອກະຊົນ ພາຍໃນ ແລະ ຕ່າງປະເທດ ເຂົ້າຮ່ວມ.

ເວທີປຶກ​ສາ​ຫາ​ລືການພັດທະນາສື່ແບບໃໝ່ຄັ້ງນີ້ ເປັນງານ ທີ່ມີຄວາມໝາຍສໍາຄັນຍິ່ງ ໃນການພັດທະນາຖັນ ແຖວສື່ມວນຊົນລາວ ຊຶ່ງມີຫຼາກຫຼາຍຄວາມຄິດ, ຄວາມເຫັນ ທີ່ຕິດພັນກັບການພັດທະນາສື່ແບບໃໝ່ ໂດຍໄດ້ຮ່ວມກັນປຶກສາຫາລືໃນດ້ານສິ່ງທ້າທ້າຍ ແລະ ໂອກາດໃນການນໍາໃຊ້ສື່ແບບໃໝ່ (ສື່​ສັງ​ຄົມ​ອອນ​ລາຍ), ສ້າງສື່ແບບໃໝ່ ໃຫ້ເປັນສື່ກະແສຫຼັກ ແລະ ເປັນທີ່ນິຍົມ, ການຊົມໃຊ້ຜະລິດຕະພັນສື່ມວນຊົນລາວ, ທິດທາງໃນການພັດທະນາສື່ມວນຊົນລາວໃນອະນາຄົດ (ເນື້ອໃນ ແລະ ຮູບແບບ), ບົດຮຽນຕົວຈິງສື່ຫຼັກຂອງຈີນ ທີ່ໃຊ້ສື່ແບບໃໝ່,​ ການຮ່ວມ​ມື​ລາວ-ຈີນ ດ້ານ​ສື່ມວນ​ຊົນ ແລະ ດ້ານ ອື່ນໆ.

ນອກນີ້, ເວທີດັ່ງກ່າວ ຍັງໄດ້ຮັບຟັງການສົນທະນາ, ແລກປ່ຽນຄໍາຄິດຄຳເຫັນໃນຫຼາຍດ້ານ ຕິດພັນກັບ​ສື່ມວນ​ຊົນ ແລະ ວຽກອື່ນໆ ທີ່ປິ່ນອ້ອມຈາກບັນດາທ່ານເອກອັກຄະລັດຖະທູດ, ຄະນະນໍາຈາກສະພາອຸດສາຫະກໍາ ແລະ ການຄ້າ ແລະ ຜູ້ຊ່ຽວຊານດ້ານເຕັກໂນໂລຊີ. ນອກນັ້ນ, ຍັງມີການແລກປ່ຽນ ຜ່ານສື່ອອນລາຍຈາກ CRI ທີ່ປັກກິ່ງ ສປ ຈີນ, ຈາກອົງການສື່ມວນຊົນຕ່າງແຂວງ ແລະ ພາກສ່ວນກ່ຽວຂ້ອງ.ໃນໂອກາດນີ້, ທ່ານ ສະຫວັນຄອນ ຣາຊະມົນຕຣີ ໄດ້ຕີລາຄາສູງ ຕໍ່ການພົວພັນ ແລະ ຮ່ວມມື​ ທີ່​ດີ​ງາມ​ ລະ​ຫວ່າງ ລາວ-ຈີນໃນໄລຍະຜ່ານມາ, ໂດຍສະເພາະປີນີ້ ເປັນປີທີ່ມີຄວາມໝາຍສໍາຄັນຍິ່ງຕໍ່ການພົວພັນ ແລະ ຮ່ວມມືລະຫວ່າງ ລາວ-ຈີນ, ຈີນ-ລາວ, ໃນນັ້ນ ອົງການສື່ມວນຊົນລາວ ທັງສູນກາງ ແລະ ທ້ອງຖິ່ນ ໄດ້ສຸມໃສ່ໂຄສະນາໃຫ້ແກ່ປີມິດຕະພາບລາວ-ຈີນ ຄົບຮອບ 60 ປີ, ພ້ອມນັ້ນ ສື່ມວນຊົນລາວ ແລະ ສື່ມວນຊົນຈີນ ກໍ່ໄດ້ພົບປະຫາລື, ແລກປ່ຽນຂໍ້ມູນຂ່າວສານນໍາກັນ ແລະ ສະແດງຄວາມຍ້ອງຍໍຊົມເຊີຍ, ຄວາມຂອບໃຈອັນຈິງໃຈມາຍັງການ​ນຳ ແລະ ພະ​ນັກ​ງານ​ CRI ທີ່ໄດ້ໃຫ້ການຊ່ວຍເຫຼືອອັນລໍ້າຄ່າ ຕໍ່ອົງການສື່ມວນຊົນລາວ ໂດຍສະເພາະ CRI ປະ​ຈຳ​ລາວ ທີ່ໄດ້ໃຫ້ການຮ່ວມມື ເພື່ອເຮັດໃຫ້ເວທີປຶກ​ສາ​ຫາ​ລືຄັ້ງນີ້ປາກົດຜົນເປັນຈິງ ແລະ ຂໍຮຽກຮ້ອງມາຍັງອົງການສື່ມວນຊົນລາວທຸກພາກສ່ວນ ຈົ່ງພ້ອມກັນນໍາເອົາບົດຮຽນໃນການພັດທະນາສື່ແບບໃໝ່ ໄປນໍາໃຊ້ໃຫ້ເກີດປະໂຫຍດສູງ ຕໍ່ວຽກງານຂອງຕົນ.

Comments

be the first to comment on this article

Leave a Reply

Your email address will not be published. Required fields are marked *

Take Me Top